الرئيسية / منتديات الوعد / “نعيب زماننا و العيب فينا و ما لزماننا عيب سوانا”
Dinar Tunisien à la Baisse

“نعيب زماننا و العيب فينا و ما لزماننا عيب سوانا”

ثلاثة أيام توا والناس الكل تبرتاجي في حكاية الدينار الطايح .. والطريق نحو الهاوية ، والافلاس وما شابه .. تقول شامتين في رواحهم …
وحتى حد ما حاول يبحث عن أسباب ذلك !!! نحن هما ألسب !! إي نحن !! الشعب العظيم !!!
نحن ل-:
– نهار كامل راقدين ، وفي الليل شادين القهاوي .
– نحن لنبرو على كل شي ومنشجعو حتى مبادرة جديدة .
– نحن لفي عام 2016 مازلنا نحكيو على ستالين و بورقيبة ونتعاركو عالتاريخ وناسين المستقبل ، لفيه الفايدة .
– نحن لعلى مباراة كرة قادم عادي نكرهو بعضنا ..
– نحن لانعرفو نحافظو على تراثنا لا على عاداتنا وتقاليدنا ومبعد نقولو : السياح شبيهم معاش يجيو !!! لواه ماشين للمغرب مثلاً ؟ خاطر في المغرب ما يطيحوش برت قديم ماللوح ، تراث ، ويبنيو معوضو مارينا مجات شي ( جربة ) !!! والأمثلة كثيرة ….
– نحن لنهار كامل نغشو في بعضنا، ملي باللحية وعامل فيها متقي، للنزل خمسة نجوم ، تقول دخلت لوكالة !!!
– نحن لناجحين الكل mention très bien ، وشطرهم عمرو ما شد كتاب !!
– نحن لفي الادارات قضية سي فلان بالوقت نقضيوهالو والمواطن يرجع غدوة .
– نحن لديمة نتبكاو ونتشكاو و لا عمرنا خممنا في حل ..
-نحن لنتبعو في عزايز في السياسة، بعد النظر عندهم مايفوتش عتبة الدار …..
– نحن ل حربنا الدنيا على حكاية كفاه البانكة كتفلس ميرجعولناش فلوسنا، وهي لحكاية معروفة من قبل وفي دول العالم الكل، أما ستانسنا نصحو على أوراق مغير منقراو لا حقوقنا لا واجباتنا ( أوراق كنترتوات رقم الهاتف الجوال كناخذو puce، أوراق حلان كونت ، أوراق لخطية ، صحح وتعدى كالبغل …)
– نحن الشعب لنهار كامل كونكتي ، في بيت العملية ، في الخدمة في التورناج في عشاء رومانسي إنت وحب حياتك ، في كل شي ….
– نحن لسيرو فينا بالتلافز كما يحبوا ويشتهاو، …
– نحن لنقراو قراية منحبوهاش ، خاطر قال شنوا فيها مستقبل، ونعرسو بمرا منحبوهاش، خاطرها تهني وبنة عايلة ، ونعملوا عرس بثلاثين مليون ، خاطر شقولو علينا الناس !! ونجيبو صغار نحكمو عليهم يعيشوا كيفنا وبالسيف، خاطر عيب نخرجو على ماهو متعارف عليه في هالمجموعة الكئيبة .
– نحن لنشدو الصف وتركب علينا اللهفة في شهر فضيل كما رمضاًن، ونطيشو شطر الماكلة في الزبلة .. وكل شي نشريوه بالكثرة تقول الدنيا وفات .
– نحن لعمرنا مافهمنا الغرب الكافر ولا حاولنا نقراو عليه ونشوفو كفاه وصلوا وخلطو وسبقونا ، فالحين كان في غرب كافر وحنا مسلمين حاشينو عليهم !!!! في حين هما حتى ديانتنا ولاو يعرفوها خير منا .
– نحن الشعب الفياس ، لموت عالريق والهداري الفارغة …
– نحن الشعب لرجال أعمالو لكبار ظهرو الكل مسالين في برشة فلوس للدولة … وكل يرحم عمي في إدارة الأعمال .. أما الاسم العالي والمربط الخالي .. وتوا قالك احبوا عالمصالحة، ماهو كان فلحنا راهو مالبارح ككان عندهم السلطه وكل شي ميسر … موش توا ..
– نحن الشعب، لعندو شباب يعمل في العجب، أما كلو خارج حدود الوطن … وقابلت منهم العشرات … وكلهم جاو حبوا يخدموا لنا ، هزوا دبشهم وفصعوا، منا نحن ، إي نحن !!!
– نحن الشعب لعادي نحطو في ألاف الشباب في الحبس، والشاب يتكلف على الدولة 28 دينار في النهار على خاطر تكيف جونطه .
– نحن الشعب لكل متصير مصيبة يقلك، كهو كلو مالثورة !!!
– نحن شعب ستانسو بنظرية القطيع ، وتوا دوروها نظرية المؤامرة وتسليم الأمر .
– نحن شعب ، الرأي العام متاعو ، في أمريكا يتخدم في عام، لنا يتخدم بحلقة في منوعة سخيفة نهارت سبت ….
– نحن مشكلتنا البخل !!!! بخل في البحث عن المشكل، بخل في الدراسة ، بخل في العمل ، بخل في الثقة بخل في تغيير الامور ..
البخل هي مشكلتنا ك شعب …
أرقدو ، العبوا الرامي ، كولو الزلابية ، أرقدو وأرقدو ، فيسو على بعضكم وموتوا دون أهداف واضحة …
ومبعد قولوا الدينار طاح . تي الشعب الكل طايح ..
سامحنا يا دينار … سامحنا يا تونس

هيفل بن يوسف

عن قسم الأخبار

Profile photo of قسم الأخبار

شاهد أيضاً

المفكر يوسف الصديق

يوسف الصديق: “لا فرق بين الغنوشي وابي عياض”

الوعد التونسي: تونس: في حوار له مع الزميلة “اخبار الجمهورية” قال المفكر يوسف الصديق ان …

اترك رد